نبدأ سويًا في الحديث عن شبكات الكمبيوتر ونتعمق بهدوء لنكتسب سويًا خبرة جيدة في عالم الشبكات أنا سمعت جملة أعجبتني في الكلية من أحد الدكاترة وهي "
أهم وظيفتين يقوم بهم الكمبيوتر هما الData Archiving والSharing " والكلام ده صحيح مية في المية بس نحب نفسره شويه
عملية الData Archiving هي عملية تخزين البيانات ولو نلاحظ هو فعلًا لو الكمبيوتر مبيخزنش بيانات كل الناس هتحس بقصور كبير فكر كدا انت بتخزن كم معلومه على الكمبيوتر والهارد بتاعك عليه حاجات قد ايه وتعالى نبعد شويه ونفكر في كم معلومه متخزنه على أجهزة تانيه وسيرفرات بنجيبها من على النت حد فينا يقدر يتخيل كم معلومة ممكن تيجي من على النت ولا كم برنامج ولا كم صورة ....
وكمان في الشركات دايمًا معلومات الموظفين والعملاء تكون متخزنة على قواعد بيانات حد فينا ممكن يتخيل شركة زي TE-Data دي عملائها بالملايين ياترى هيخزنوا بيانات كل عميل في ورق ازاي؟
أكيد يعني موضوع تخزين المعلومات على الكمبيوتر ده حاجه مهمه جدا جدا وطبعًا لو بصينا للسوق هنلاقي من أعلى الوظائف في المرتبات هي وظائف الداتا بيز علشان الداتا بيز هي أهم وسيلة لتخزين المعلومات الكبيرة والمهمة ... طيب الوظيفة التانيه هي الData Sharing وهي عبارة عن مشاركة الملفات مع الناس يعني من الآخر كدا الانترنت والشبكات تخيل الدنيا من غير انترنت ومن غير شبكات مش هقدر بقا اكلم اصحابي ولا هقدر أنزل معلومات من الانترنت ولا هقدر الاقي معلومات بسهوله علشان اعمل ابحاث والكتب الي بنزلها من النت والالعاب والبرامج وحاجات كتير جدا جدا يخسرها الناس من غير وجود الشبكات في عالم الكمبيوتر وبرده هتلاقي وظائف الشبكات دي ليها مرتبات كبيره في السوق لأن الشبكات شيء مهم وضروري وطبعًا انا مش بتكلم في الشبكات علشان احنا رايحين ندور على وظيفة والكلام ده الارزاق بيد الله بس احنا عايزين نتعلم من أجل طلب علم يعني عايزين نغوص كدا ونتعمق في دنيا الشبكات دي ونبتدي نقرا كتير ونتعلم كتير.
1- Introduction:ما هي الشبكة؟الشبكة ببساطة هي عبارة عن مجموعة مكونة من جهازين أو أكثر متصلين ببعضهم البعض لمشاركة بعض الموارد "ملفات,تطبيقات,طابعات, ..." أو حتى لإجراء محادثات نصية أو صوتية وما إلى ذلك.
مالفرق بين الNetwork والInternetwork ؟Network: هي عبارة عن شبكة بين مجموعة من الأجهزة مثل الشبكات الموجودة في الشركات أو الشبكات المنزلية.
Internetwork: هي عبارة عن شبكة كبيرة مكونة من مجموعة شبكات مختلفة في النوع وتنتمي لأنظمة مختلفة ومثال على ذلك الانترنت.
تطور الشبكات:عندما نعود بالزمن للوراء نجد أن الشركات كانت تحتوي على أجهزة كمبيوتر متعدده ولكن لم تكن الشبكات قد اخترعت فكان الموظف عندما يريد نقل المعلومات من جهاز لآخر كان يقوم بوضع المعلومات على فلوبي ديسك ويضعها في الجهاز الآخر وهذه عملية بها مضيعة كبيرة للوقت وليست بالأمر العملي خصوصًا مع زيادة عدد الأجهزة وأيضا كانت عملية مشاركة الملفات محدودة بالمكان الجغرافي فلو أردت نقل ملفات لصديق لي في بلد آخر فسأضطر للسفر إليه لأعطيه الملفات وهذا النوع من التشبيك يسمى بال
Sneakernet.
بعد ذلك ظهر مايسمى بال
Main Frame وهو عبارة عن كمبيوتر كبير جدا يحتل مساحة قاعه كاملة وله امكانيات كبيره جدا من حيث السرعة والمساحه وما إلى ذلك ويوضع في مركز الشركة وتتصل به الأجهزة جميعها عن طريق الكابلات ولاحظ أن الجهاز المتصل بالMain Frame يكون عبارة عن شاشه وكيبورد فقط وجميع المعلومات مخزنة على الMain Frame وجميع العمليات تتم عليه فكل مايفعله المستخدم هو الاتصال بالMain Frame عن طريق الكيبورد والشاشة ويقوم بتنفيذ العمليات وتظهر له النتائج على الشاشة... لاحظ أن الكيبورد والشاشة لا يسمون جهاز كمبيوتر ولكن تسمى
Terminalمن عيوب هذا النوع هو البطء الكبير في الشبكة لأن جميع العمليات تتم في جهاز واحد وبالطبع مع زيادة عدد الTerminals ستكون العملية بطيئه والعيب الآخر هو أن الMain Frame حجمة كبير
وسعره غالي جدًا
بعد ذلك ظهرت أجهزة الكمبيوتر الشخصية التي نستعملها الآن وهي مايسمى بالPersonal Computer أو الPC وظهرت الشبكات التي تعتمد على الكابلات فيتم توصيل كل الأجهزة مع بعضها بكابلات وبالطبع
كما تعلمون فيوجد الآن شبكات بدون كابلات ولا أسلاك وهي شبكات الوايرلس.
وبداية الشبكات بالظبط كانت لأغراض عسكرية فقط ففي عام 1969 قامت وزارة الدفاع الأمريكية بتمويل مشروع لربط الوزارة مع متعهدي القوات المسلحة وعدد كبير من الجامعات التي تعمل على أبحاث ممولة من القوات المسلحة ، وسميت هذه الشبكة باسم ARPANET اختصار الكلمة الإنجليزية Advanced Research Project Administration وكان الهدف من هذا المشروع تطوير تقنية تشبيك كمبيوتر تصمد أمام هجوم عسكري
فيما بعد لم يقتصر أستخدم شبكة " أربانيت " على القوات المسلحة فحسب فبعد نجاح هذا المشروع بدأت بعض الجامعات الأمريكية بربط أجهزتها مع هده الشبكة قصد تمكين مستخدمي هده الشبكة في الولايات المتحدة الأمريكية من الاطلاع على معلومات معينة و بالتالي خرجت شبكة " ARPANET" عن النطاق العسكري لتشمل المعلومات العامة و مع تضاعف عدد الجامعات التي دخلت هده التجربة حدث ازدحام غير متوقع على الشبكة أدى إلى ظهور مشاكل ...فاضطر القائمين على الشبكة إلى فصل (الشبكة العسكرية ) عن (الشبكة المدنية) وذلك بإنشاء شبكة جديدة تحمل اسم MILNET لتقتصر على المواقع العسكرية فقط عام 1983 وأصبحت شبكة " أربانيت " تتولى أمر الاتصالات غير العسكرية ، مع بقائها موصولة مع MILNET من خلال برنامج أسمه بروتوكول الانترنت Internet Protocol "IP" وبالطبع الاي بي من أشهر المفاهيم التي نسمعها كثيرًا في عالم الشبكات في يومنا هذا وهو عنوان رقمي لأي جهاز متصل بشبكة وسنتحدث عنه فيما بعد وفي عام 1990 انتهى عمل شبكة الArpanet لكثرة مشاكلها مع تزايد المستخدمين وبالطبع حلت محلها شبكة الانترنت التي تحوي الآن مئات الملايين من المستخدمين
2- Goal of Networks:توفر لنا الشبكات العديد من الخدمات وهنا نذكر بعضها
1- سهولة تبادل الملفات والبيانات بين الأجهزة.2- سهولة الحصول على المعلومات من أي مكان باستخدام شبكة الانترنت
3- ربط أفرع الشركات مع بعضها البعض بسهولة
4- مشاركة بعض الأجهزة مثل الطابعة والفاكس وغيرها
5- امكانية العب الجماعي عبر الشبكات
6- اجراء المكالمات النصية والصوتية وغيرها
3- Host types:قبل الحديث عن أنواع الHost لنتعرف سويًا على مصطلح HOST
الهوست هو أي جهاز كمبيوتر متصل بشبكة من النوع TCP-IP وهي النوع المتداول بيننا .. يعني ممكن نقول أي جهاز كمبيوتر متصل بالشبكة يسمى Host.أنواع الهوست في الشبكة نوعين وهما Client أو Server طيب ماهو الفرق بينهما؟عند اتصال جهازين مع بعض فإن الجهاز الذي يقدم خدمة للآخر هو السيرفر والجهاز الذي يأخذ الخدمة هو الكلينت .. ونلاحظ لما موقع يكون مش راضي يفتح بيقولوا السيرفر بتاعه مهنج أو السيرفر وقع من كتر الناس الي دخلت عليه ...تعريف السيرفر بشكل عام هو جهاز على الشبكة يقدم خدمات للأجهزة الأخرى والأجهزة الأخرى تسمى Clientsناخد أمثلة كدا علشان نفهم الموضوع ده كويس لأنه مهم جدًالو واحد معايا في الشبكة قالي ياحمد انا عايز برنامج كذا رحت انا عملت للبرنامج ده Sharing وقلت له خده من على الشبكة في الحاله دي هكون انا السيرفر وهو الكلينت ولاحظ ان في نفس الوقت هو ممكن برده يعمل Sharing لأي حاجه وأنا اخدها منه وأكون انا الكلينت وهو السيرفرمثال آخرانت لما تفتح صفحة جوجل مثلا فانت تتصل بسيرفر جوجل علشان هو يقدم لك الصفحة الي انت بتشوفها في الفايرفوكس عندك أو الانترنت اكسبلورر فانت كلينت وسيرفر جوجل أكيد اسمه سيرفر.مثال أخيرانا لما أحب اتصل بجهاز حضرتك في الحالة دي انا جهازي هيكون كلينت وانت جهازك سيرفر لأن جهازي بيطلب الاتصال بك وانت تتيح له الاتصال يعني انت تقدم الخدمه وانا اخدها يبقا انا الكلينت وانت السيرفر.في تعريف تاني للسيرفر والكلينت بس دول من تأليفي انا لكن هما هيقربوا لك المعنى أكترحضرتك لما تيجي تتصل بواحد صاحبك بيكون بينكم اتصال ... وبالطبع انت لما تتصل بصديقك بتكون اسمك متصل وهو اسمه مستقبل للإتصالطيب خلاص بكل بساطه كدا أي جهازين أو مجموعة أجهزة بتتصل مع بعضها في شبكة الجهاز المتصل هيكون هو الكلينت والجهاز المستقبل للإتصال هيكون هو السيرفرعلشان كدا لو انا بتصل بجوجل يبقا هوا سيرفر وانا كلينت ولو انا عملت شيرنج لملف وواحد خده مني يبقا هو كلينت وانا سيرفر لأنه علشان ياخده اتصل بيا وهو طبعًا المتصل وانا المستقبل وهكذا...لازم تعرف ان استحاله كلينت يكلم سيرفر غير لو كان في برنامج سيرفر موجود على السيرفر وبرنامج كلينت موجود على الكلينت
يعني انا لما بعمل شيرنج لحاجه انت بيكون عندك مجموعة برامج جايه مع الويندوز خاصه بالشيرنج وفيها كلينت وسيرفر فبتتيح لك انك تعمل شيرنج وانك تدخل على الشيرنج بتاع أجهزة تانيه بس لاحظ بقا لو انا على نظام تاني غير الويندوز مثلا لينكس مش هعرف اشوف الشيرنج بتاعك ولا انت هتعرف تشوف بتاعي لأنك معندكش برنامج الشيرنج بتاع اللينكس ولا انا عندي الشيرنج بتاع الويندوز برده برنامج الفايرفوكس الي انت بتدخل بيه على النت ده هو اسمه كلينت لأنه بيخليك تدخل على الأجهزة التانيه عن طريق صفحات الويب ولازم الجهاز الي هتدخل عليه يكون عليه سيرفر اسمه Http Server
ولو انا وانت بنلعب لعبه على الشبكة واحد مننا هيعمل سيرفر والتاني يدخل عليه فلذلك اللعبه عندك جاي معاها جزء الكلينت والسيرفر وانا برده معايا الجزأين علشان يبقا متاح لأي واحد فينا يكون كلينت والتاني سيرفر.ملاحظات- كلمة كلينت وسيرفر دي ممكن تطلق على الأجهزة فيكون جهازي كلينت وجهاز حد تاني سيرفر والصح إنها تطلق على البرامج لأن الكلينت اسمه جهاز كلينت لأنه متحمل عليه برنامج كلينت والسيرفر اسمه سيرفر لأنه متحمل عليه برنامج سيرفر
يعني تأكد أن أي برنامج بيتيح للأجهزة تتصل ببعضها عن طريقه أو لعبه لازم تلاقي له جزأين جزا أسمه كلينت وجزأ اسمه سيرفر بس هما بيكونوا سوا وانت مبتأخدش بالك انما مبدأ ان أي برنامج بيتيح الاتصال بين الأجهزة لازم يكون فيه كلينت وسيرفر ده حاجه أساسية مش ممكن أتصل بيك عن طريق أي برنامج غير لو كان عندك جزء السيرفر من البرنامج ده وانا عندي جزأ الكلينت وفي أغلبيه البرامج بيخلوا الجزأين مع بعض بحيث يتاح ليك تكون سيرفر وانا كلينت أو انا سيرفر وانت كلينت.
يعني الشباب الي زيي كدا الي لعبوا لعبة Silk Road يعرفوا ان دايما بنحمل عندنا برنامج اسمه SilkRoad Client علشان نتصل بسيرفر اللعبه ونلعب اونلاينالفكره هي ان في سيرفر في مكان بعيد على الانترنت للعبه وكل الاعبين بيحملوا برنامج كلينت علشان يخلي جهازي كلينت والجهاز التاني أكيد متحمل عليه برنامج مخليه سيرفر والبرامج بقا تكلم بعضها وفي الحالة دي انا كلينت بتصل بالسيرفربرده في برنامج نت منزله مره فايدته انه يخليني اقدر ادخل على جهاز تاني واتحكم فيه بشكل كامل اخد اي حاجه واشوف هو بيعمل ايه واعمل كل الي احبه حتى لو اطفي له الجهاز او اعمل له رستارت بس طبعًا لما اجي ادخل هيكون في باسورد تتطلب مني مش بدخل سرقه يعني زي الهاكرز
المهم ان مدام انا هستعمل البرنامج علشان ادخل على جهاز حد تاني يبقا المفروض كدا اني متوقع ان الراجل الي هدخل عليه لازم يكون محمل عنده جزء من البرنامج اسمه Server وانا متحمل عندي جزء اسمه Client وفعلا لما عملت دونلوود للبرنامج لقيت جزء اسمه سيرفر وجزء اسمه كلينت انا حملت السيرفر عند الجهاز الي عايز اتصل بيه والكلينت عندي وظبطت الاعدادات واتصلت بيه بنجاح الحمدلله
- زمان كنت لما أدخل سيبر كانوا الناس يقولوا لي خلي بالك الواد الي هناك ده هاكر وممكن يكون حاطط على الجهاز الي انت رايح تقعد عليه ده سيرفر علشان يسرق ايميلكانا بقا من ايامها مكنتش فاهم يعني ايه يحط سيرفر يسرق بيه ايميلي الا لما دخلت في الشبكات وفهمت بقا واتنورت طبق معايا كدا المبدأ الي قلنا عليه المتصل هو الكلينت والمستقبل هو السيرفر يبقا الراجل الهاكر ده راح جه على الجهاز الي عايز يسرق ايميلي منه وحط ملف اسمه سيرفر يعني هيخلي جهازي سيرفر علشان هو يروح من أي جهاز تاني يقوم متصل على السيرفر ده ويدخل بقا على جهازي يسرق الي هو عايزه... يعني فايده ملف السيرفر انه بيكون برنامج على جهازي يخلي جهازي سيرفر وبالتالي جهازي يستقبل الاتصالات وهو بقا يروح حاطط ملف كلينت على اي جهاز تاني ويتصل على جهازي ويدخل يعمل الي هوا عايزه.
كدا نبقا اتكلمنا شويه في مقدمة لعالم الشبكات ولسه هنكمل ان شاء الله بس بعد متقروا الكلام ده كويس وتفهموه...ولو في أسئلة أنا هكون سعيد ان في ناس قرت الكلام وحابه تستزيدفي أمان الله